USA ka semana ug tulo pa ka adlaw sa di pa ang eleksyon, aduna nay giingong mga ‘vote buying’ sa Dakbayan sa Sugbo.

Kini subay sa mga nanggawas nga sample ballot sa duha ka lokal nga mga partido sa Cebu City, ang Bando Osmeña Pundok Kauswagan (BOPK) ug Barug PDP-Laban.

Apan Commission on Elections way mahimo kon way saksi.

Sa Facebook post sa Tomas ang Hari sa Sugbo page, kinsa giingong gipadagan sa mga kritiko ni Mayor Tomas Osmeña, gipakita ang card/ sample ballot sa BOPK diin naa ang ngalan sa voter, precinct number ug barangay diin anaa ang mga kandidato sa grupo.

Sa card, naka-staple ang P1,000 diin giawhag nga straight nga pabotaran ang ilang kandidato.

“Boss admin, mao ni ang nadawat sa akong mama diri sa Lahug. Sayo gyud kaayo nanuktok. Naa pa poy pakapin bugas 3 kilos,” tipik sa post niadtong Mayo 2.

Sa samang adlaw , adunay ginganlan og Lovely Amor ang ni-post sa iyang Facebook account diin gipakita ang sample ballot/card habig sa grupo ni Bise Mayor Edgardo Labella nga adunay gipataban nga P5,000 apan wa gi-staple bugti sa pagboto sa ilang mga kandidato.

“Mas grabe ni! Palit jud tibuok pamilya. Ipasiguro lang Mayor Labella ug Niña Mabatid,” post ni Lovely Amor, kansang botante nga anaa sa card nagpuyo sa barangay Lahug.

Ginuo ang bahala nimo

Si Labella, mayoralty candidate sa PDP-Laban, nisalikway sa maong pasangil.

Iyang gitugyan ngadto sa Kahistas-an ang gibuhat sa ginganlan og Amor.

“Since I entered politics, I never resorted to vote buying just to win. Not then, not now. To the one who posted this malicious picture, ang Ginuo na lang ang balala nimo, Day. May God bless you,” post ni Labella sa iyang Facebook page nga Edgar Labella.

Ang Superbalita Cebu nipandangat og mensahe ngadto kang Osmeña aron unta kuhaan sa iyang reaksyon may labot sa pasangil, apan hangtod ning pagsuwat og balita, wa pay nadawat nga tubag ning pamantalaan.

Gibantayan

Giangkon ni Atty. Chauncey Boholst, acting election officer sa Cebu City north district, nga alerto sila kauban ang mga pulis sa posibleng vote buying sa dakbayan.

Iyang gihulagway nga init ang panag-atbang nila ni Labella ug Osmeña.

Apan iyang giangkon nga di sila molampos pagsilot sa mga nakalapas sa Omnibus Election Code kon wa ang publiko isip saksi sa kaso sa vote buying.

“We encourage witnesses to come forward unya mo-execute og affidavit aside sa pulis kay dugay na tang nagsige og awhag sa katawhan nga kon naa gani vote buying. Di man gyud na masulbad aa Comelec ug pulis. Kinahanglan na og partisipasyon sa katawhan,” padayag ni Boholst.