MAAYONG balita ngadto sa mga taga Visayas, labina na sa mga Sugbuanon nga wa pa makakuha og passport sa miaging tuig sa SM Seaside City.

Ang Department of Foreign Affairs pinaagi sa Office of the Presidential Assistance for the Visayas (OPAV) nipahibawo nga inay kutob ra sa Disyembre 27 ang ilang Passport on Wheels (PoW) sa SM Seaside, gilugwayan kini hangtod sa Marso 30, 2020.

“DFA have extended the Passport on Wheels in SM Seaside till March 30, 2020! Secure an appointment now to get your Pasaporte,” tipik sa post sa OPAV sa ilang official Facebook page.

Ang Passport on Wheels usa ka programa ni Secretary Michael Dino para mapadali ang pagproseso sa mga Sugbuabon sa ilang mga passport nga di na moadto sa buhatan sa DFA Cebu nga nahimutang sa Dakbayan sa Mandaue.

Ang PoW unang gilusad sayo sa 2019 ug natapos niadtong Abril. Apan gilugwayan sa DFA gumikan sa hangyo ni Dino hinungdan nga nilanat hangtod niadtong Disyembre 27 ug karon giinat na sab. (PAC)