PORMAL nang gilusad sa Department of Foreign Affairs (DFA) ang ilang Passport on Wheels (POW) para pag-atiman sa bag-ong aplikante ug kadtong gusto mag-renew sa ilang pasaporte.

Si DFA Secretry Teodoro Locsin Jr., nagkanayon nga sukad ilang gisugdan ang maong programa sa miaging tuig, nianot na og 218,226 ka pasaporte ang ilang maisyu sa 284 ka lugar nga nabisita sa POW.

“It is my great pleasure to be here in Cebu today and to take the opportunity to launch the DFA’s Passport on Wheels mega vans, in our quest to bring passport services closer to the people of Cebu,” pulong ni Locsin.

Ang DFA Cebu gikatakdang padak-an ni Locsin aron usab makaatiman kini og dugang aplikante. Ang DFA adunay 2 ka mega-van kon 16 ka data capturing machine para maoy mokuha sa hulagway ug biometrics sa mga aplikante.

Si Assistant Secretary for Consular Affairs nga si Neil Frank Ferrer niingon makaproseso ang usa ka van ug 800 ngadto sa 1,000 kon 1,600 ngadto sa 2,000 ka mga aplikante.

Ang POW sa SM Seaside City abli gikan sa alas 9 sa buntag hangtod alas 5 sa hapon gikan sa adlaw ng Lunes hangtod Sabado. Ang pag-apply sa online para sa appointment magsugod alas 12 sa udto hangtod alas 9 sa gabii.

Ang POW molungtad hangtod sa Pebrero 28 apan ang OPAV niingon nga molungtad kini hangtod Marso 2.

Si Locsin niingon nga kon gustohon ni Secretary Michael Dino sa OPAV gumikan sa bul-og sa katawhan kinsa gustong mo-apply, ila pa kining lugwayan.

Lakip sa nitambong sa launching ailang Marissa Fernan sa SM, Bise Mayor Edgardo Labella, mga opisyal sa DFA ug kaalyado sa PDP-Laban. (PAC)