PATAY na nga napalgan ang usa ka pawikan sa baybayon sa lungsod sa Bantayan, isla sa Bantayan niadtong Huwebes sa hapon, Oktubre 3.

Si PSsgt. Lope Arcillas, desk officer sa Bantayan Police Station nga nahinabi sa Superbalita Cebu, niingon nga usa ka concerned citizen ang nanawag kanila nga mipahibawo kalabot sa pawikan.

Dugang pa ni Arcillas nga ang pawikan napalgan sa Sitio Sayao, Barangay Batingue ug dali nga gisusi sa mga pulis.

Sa pakisusi sa mga residente sa barangay, ang pawikan nakit-ang naglutawlutaw sa dagat hinungdan nga gitabangan sa mga residente nga madala sa baybayon.

Gipahibawo usab sa mga pulis ang Bureau of Fisheries and Aquatic Resources (BFAR) ingon man ang Department of Agriculture (DA) aron masusi ang hinungdan sa pagkamatay sa pawikan.

Dugang ni Arcillas nga ang pawikan nasuta sa mga personahe sa BFAR ug DA nga dunay nanurok nga mga bukol sa lawas.

Gituohang mao kini hinungdan sa kamatayon sa pawikan.

Gipalubong dayon kini kay nagsugod na og kabaho.