DILI mominos 21 ka mga tawo ang nasikop sa managlahing kalapasan sa piyesta sa dakbayan sa Talisay niadtong Martes, Oktubre 15.

Kini usa ka adlaw pa lang nga paglingkud ni Police Major Gerard Ace Pelare isip hepe sa Talisay City Police Office.

Gilusad dayon niya ang ‘Oplan Limpyo Talisay’samtang, giatiman usab sa mga pulis ang kahapsay ug kalinaw sa dagkung kalihukan sa piyesta.

Gihulagway man nila ni Talisay City mayor Gerald Anthony Gullas ugPelare nga nagmalampuson ug malinawon sa kinatibuk-an ang pagsaulog sa kapistahan.

Walay dinagko ug bisan ginagmay nga insedente atol sa piyesta.

Apan 21 ka mga Talisaynon, ang nitiwas sa ilang pagsaulog sa piyesta diha na sa prisuhan, human nga nangadakpan sa kapulisan.

Mga kasong labot sa illegal gambling sama sa mah-jong, tong-it, ug paaway kaka (spider), ug aduna usab unom sa 21 ang nasakpan nga nag-pot session kon naghihit og ginadili nga drugas.

Usa sa nasikop ang 57 anyos nga inahan, nga si nagpailang si Anne, kinsa lumargahay unta Miyerkules, Oktubre 16 padung’ sa Manila alang sa pagkuha sa iyang papeles, nga gamitunon sa paglarga sa gawas sa nasud.

Nasakpang siya nga nag-mahjong, isip kabahin sa ilang pagsaulog sa piyesta ug despideda sa paglarga.

Gihimo ang mga operasyon sa barangay San Roque, Tabunok ug Poblacion. Gsugdan kini sa Martes sa alas 12:01 sa kaadlawon, Oktubre 15, hangtud sa alas 12:01 sa Myerkules sa kaadlawon.

Matud ni Pelare nga usa na kini sa pagpakita alang sa kaseryuso sa Talisay Police sa pagpatuman sa Oplan Limpyo Talisay.

Gipasabot ni Pelare nga padayunon niya ang mga nasugdan nga programa sa iyang gihulipan nga si Police Major Orlando Carag, Jr. ug palambuon pa.

Gawas sa subsob pa nga anti-drug operation, mohimo usab sila og mga pagbisita, pag-agni sa mga tawo sa matag barangay nga mobatok sa drugas.

“We will still be continuing this relentless operations against illegal drugs, ang atong madugang is I want the war on drugs to be inclusive, meaning the other sectors must participate actively, in a form of activities nga makita gyud ang tanang’ tawo against illegal drugs, nga it is not police alone,” pasabot ni Pelare.

Sa kapin usa ka adlaw pa lang ni Pelare nakadayeg na usab ang mayor niini sa gipatuman alang sa kalampusan, kahapsay ug kalinaw atol sa adlaw sa piyesta.

Niadtong ganbii sa piyesta, gibanabana nga 15 mil ka mga tawo ang ningsaksi ug ningsalmot sa konsyerto sa pagtaposa sa mga kalihokan sa kapistahan. (FMD)