NASIKOP sa awtoridad ang giisip sa Euro Police (Europol) nga most wanted nga tiggama ug tigbaligya sa dark-web sa child sexual exploitation materials (CSEM) o mokuha og hulagway o video sa mga bata nga giabuso aron ibaligya sa internet.

Naila ang suspek nga si Nelson Siacor Turayno, 32, kinsa nasikop sa iyang giabangan nga lawak sa Barangay Luz, dakbayan sa Sugbo, diin daghan pang hulagway lakip ang video sa mga bata nga giabuso sa mga hamtong ang nasakmit.

Ang joint operation gipangulohan kini sa National Bureau of Investigations - Anti-Human Trafficking Division (NBI-AHTRAD) ug Philippine National Police - Women and Children Protection Center (PNP-WCPC).

Niadto pang Abril 12 nadakpan si Turayno apan tungod sa imbestigasyon nga gihimo pa aron masikop ang ubang mga aduna’y kalambigitan sa maong krimen, wala una kini gipagawas ngadto sa publiko.

Ang operasyon gisuportaran kini sa Philippine Internet Crimes Against Children Center (PICACC), Australian Federal Police (AFP), United Kingdom National Crime Agency (NCA), ug sa non-government organization nga International Justice Mission (IJM).

Matod sa hepe sa NBI-AHTRAD nga si Atty. Janet Franciso nga nagpamatuod lang kining pagkasikop ni Turayno isip testamento sa pagpanakop niining nihimo og online sexual exploitation of children (OSEC).

Si PBGEN William Macavinta, hepe sa WCPC sa PNP niingon nga makasubo nga usa ka Pinoy ang most wanted sa Europol nga sexual offender.

Niadtong Septiyembre 2018 dihang gitunol sa Queensland Police Service sa Australia ang impormasyon bahin kang Torayno diin gitun-an kini og maayo sa NBI ug PNP.

Nalutsan kini og search warrant niadtong Abril 12 ug kasamtangan nga anaa natangong sa Bagong Buhay Rehabilitation Center ang suspek.

Walo ka mga bata ang na-rescue subay operasyon diin gipaubos na sa trauma-informed interventions gikan sa Department of Social Welfare and Development (DSWD).

Mag-atubang og kasong kalapasan sa Anti-Trafficking in Persons Act o Republic Act 9208, RA 10175 o ang Cybercrime Prevention Act of 2012, RA 9775 o ang Anti-Child Pornography Act of 2009 ug RA 7610 o ang Child Abuse Law si Turayno. (HBL)