KON usa ka sa gilisdan sa eksaminasyon sa pagkuha og driver’s license sa Land Transportation Office, di na mabalaka, tungod kay mamahimo na nga makapili og Bisaya o Cebuano nga pinulongan sa pagkuha niini.

Sugod Marso aduna na’y kapilian ang mopaubos sa eksaminsayon sa driver’s license sa Land Transportation Office (LTO) human niluwat og direktiba si Department of Transportation (DOTr) Secretary Arthur Tugade nga gawas sa Ingles ug Tagalog, mamahimo na usab nga kapilian ang lokal nga pinulongan.

Sa Department Order 2020-003 ni Tugade nga “Directing the Land Transportation Office to conduct driver’s license examination in English, Tagalog, or other regional dialect at the option of the examinee,” gipirmahan sa kalihim niadtong Pebrero 14 ning tuiga.

Tipik sa maong direktiba gisaysay niini nga ubos sa Section 7, Article XIV sa 1987 Constitution ang opisyal nga dialekto sa nasod, Filipino, apan kon gimando sa balaod mamahimo ang pinulongang Ingles, samtang auxiliary official dialect usab ang regional dialect.

“In the interest of justice and for the effective enforcement of land transportation laws, the DOTr recognizes the need to afford examinees the opportunity to fully comprehend the Driver’s License Examination,” tipik sa department order ni Tugade.

Matod ni Tugade nga aduna’y 30 ka adlaw nga motuman ang regional directors sa LTO offices sa nasod subay sa 15 ka adlaw nga pag-effect sa maong mando sukad kini namantala sa pamantalaan.

“LTO Regional Directors to provide a translation of Driver’s License Examination in their respective Regional Dialect within thirty (30) days from the effectivity of this Order,” tipik sa maong order.

“Mas dali sila makasabot,” si LTO Central Visayas regional director Victor Caindec ngadto sa mga mokuha sa exam subay niining direktiba ni Secretary Tugade. (HBL)