GIKANSELAR sa Philippine Coast Guard (PCG) 7 ang pipila ka biyahe sa dagat kagahapon, Dominggo, Enero 20, tungod sa bagyong Amang.

Sa notisya nga giluwatan sa Cebu Coast Guard kagahapon sa buntag wala nila tuguti ang biyahe pagawas ug paingon sa Northern Cebu, Eastern Bohol, Southern Leyte, Leyte, Biliran, Samar, ug Eastern Samar sa Visayas.

Samtang lakip usab nga wala na pabiyahe-a ang paingon sa Agusan del Sur ug del Norte, Surigao del Sur ug del Norte, Dinagat Islands, ug Camiguin sa Mindanao.

Kini gihimo bisan walay storm signal sa Metro Cebu apan ang destinasyon sa barko may giisa nang storm signal.

Mohimo og anunsiyo ang Coast Guard kon pananglitan nga mamahimo nang makabiyahe ang sakyanang pandagat sa apektado nga dapit.

Samtang ang Bagyong Amang nasigpatan sa 175 kilometros habagatang sidlakan sa Surigao City, Surigao del Norte, kagahapon sa alas 4:00 sa hapon.

Sa pagkutlo ning balita, gipanglatawan nga ni- landfall ang maong bagyo sa Siargao Island.

Maayo na usab nga panahon ang masinati sa Sugbo tungod kay dili na kini maapektoha sa bagyo karong adlawa. (HBL)