GIAPROBAHAN na sa Land Transportation Franchising and Regulatory Board (LTFRB) sa ulohang buhatan ang pagpatuman na sa provisional nga umento sa pletihan nga P9 sa unang lima ka kilometros ug P1.55 sa matag mosunod nga kilometro sa mga bus ug mini bus sa tibuok nasod, apil sa lalawigan sa Sugbo.

Apan usa ka opisyal sa LTFRB 7 nipasidaan sa mga operator nga dili sila mahimo mopatuman sa bag-ong pletihan kon wa sila molukat og bag-ong taripa.

Si Reynaldo Elnar, transportation development officer sa LTFRB 7, niingon nga ang LTFRB central office niaprobar sa adjustment sa pletihan sa public utility buses (PUB) niadtong Oktubre 18, 2018.

Apan gumikan sa pagkunhod sa presyo sa gasolina ug ubang mga produkto sa petrulyo, gipugngan una ang pagpatuman niini.

Apan atol sa Regional Management Conference sa LTFRB didto sa Camiguin niadtong Marso 8, 2019, nasabotan nga ipatuman na ang provisional fare increase.

Sa usa ka kamandoan nga gipublikar sa LTFRB 7 sa usa ka mantalaan sa Sugbo niadtong Marso 14, 2019, gimando niini nga epektibo na dayon ang bag-ong pletihan nga P9 sa unang lima ka kilometros ug P1.55 sa mosunod nga matag kilometro sa ordinaryo nga bus, basta dunay bag-ong taripa. Kon regular nga air-conditioned bus kay P1.75 ang madugang sa matag mosunod nga kilometro, P1.85 kon deluxe aircon bus, P1.95 kon super de luxe aircon bus ug P2.40 kon luxury aircon bus. (SCG)