NAKA-red alert na sugod Martes, Abril 23, ang kapulisan sa Central Visayas alang na sa National Youth Day (NYD) tungod sa pagpangabot sa 12,000 ka mga delegado gikan sa nagkalainlaing dapit sa nasod ug 3,000 volunteers.

Send-off mass alang sa mga motabang alang sa kalampusan sa kalihukan pinanguluhan ni Cebu Archbishop Jose Palma gihimo sa Lunes buntag, Abril 22, kinsa nipahibaw nga andam sila alang sa NYD 2019.

Ugma na ang gikatakda nga pag-abot sa Sugbo ang dakong bahin sa delegado alang sa dakung tigom sa mga batan-on, lukop nasud.

Gitug-an ni PRO 7 Director Brig. Gen. Debold Sinas nga tungod sa nahitabo nga pagpamomba sa mga simbahan sa Sri Lanka atol sa Dominggo sa Pagkabanhaw, Abril 21, mas gidoble pa ang seguridad.

Mas gipahugtan usab ang gihimo nga intelligence monitoring.

Apan giklaro ni Sinas nga walay hulga nga nadawat ang rehiyon siete.

“We call on the Intel units of the region 7 to assess kon naa bay impact ang Sri Lanka bombing diri nato. So ang atong deployment (for the NYD) daily gyud siya, mo-vary atong deployment dili siya stagnant,” matod ni Sinas

Libuan ka mga pulis, sundalo, kabomberuhan ug uban pa nga force multiplier ang motabang alang sa pagpatunhay sa kahapsay ug kalinaw.

Sa iyang bahin ni Bishop Palma, naguol man sa nahitabo sa nasud sa Sri Lanka, apan awhag niini nga dili mahadlok o dili magpadala sa kahadlok, ug nga isalig ngadto sa kahitas-an ang alang sa kalampusan sa daku nga kalihukan sa mga batan-on, ilabi na nga tuig usab karon sa mga youth.

Masaligon ang amahan sa simbahang’ Katoliko nga sa gihan-ay nga security plan sa awtoridad.

Ang National Youth Congress ang himuon sa lima ka adlaw, diin sugdan ang ilang mga kalihukan sa hapon sa Abril 24, Miyerkules, pinaagi sa usa ka prosisyon gikan sa Cebu City Sports Center padung sa Basilica Minore del Sto. Niño, diin himuon usab ang opening mass.

Ang libuan ka mga delegado ang i-house sa mga foster families gikan sa mga siyudad sa Cebu, Mandaue ug Lapu-Lapu.

Aduna kini 52 ka host parishes ug siyam ka festival sites. Gawas sa mga delegado gikan sa nagkalainlaing parokya sa tibuok Pilipinas, gilantawan nga naa usab uban pa nga pilgrims.

Matod ni Sinas nga dili makasulod diha sa nagkadaiya nga venue ang mga walay accredited identification card gikan sa NYD organizer.

Walay si bisan kinsa nga gitugutan nga makadala og backpack, gawas sa uniformed backpack nga gihatag usab sa organizer sa NYD alang sa tanang delegado.