USA ka pulis nga giingong nagpasiugda sa tigbakay, ang nasikop uban sa laing 11 ka mga tawo sa ronda nga gilusad sa kapulisan sa Purok Dragon Fruit, Sitio Ka Santos, Barangay Cabadiangan, lungsod sa Liloan niadtong Sabado, Enero 29, alas sa 5:00 sa hapon.

Si Police Staff Sgt. Jun Ernie Lucero Camero, 34, ulitawo, nadestino sa Provincial Plans and Program Units sa Cebu Police Provincial Office (PPPU-CPPO) ug taga, SitioTabunok sa Barangay Cabadiangan, Liloan lakip sa nasikop human sa ginukdanay sa kapulisan sa Liloan.

Si Police Major Ramil Morpos, hepe sa Liloan Police Station nga nahinabi sa Superbalita Cebu, nagkanayon nga makadaghang higayon nga gi-report ang maong dapit bahin sa tigbakay apan makadaghan na usab mapaltos ang ilang operasyon tungod kay nakabantay ang mga sugarol.

Matod ni Morpos, nakadawat sila og taho nga pulis ang tigpasiugda sa tigbakay.

Apan, dason ni Morpos, si Camero, nihimakak sa alegasyon nga nagpasiugda sa sugal sa manok apan niangkon nga igo lang nipusta human paborito niya kini nga kalingawan.

Dugang ni Morpos, si Camero nangayo og pasaylo ug dawaton na lang niya ang kasong kalapasan sa Presidential Decree 1602 o illegal gambling cockfighting ug kasong administratiba.

“Kahilakon siya nangayo nakog pasaylo sa iyang sayop nga nahimo. Pero dili sab mamahimong dili siya pusasan, patas sila tanang dinakpan,” sumala ni Morpos.

Gidugang niya nga piyesta sa nahisgutang lugar hinungdan nga kusog ang sultada.

Sigon sa hepe, gibanabana niya nga kapin sa gatos ang nagtapok sa tigbakay apan nakaipsot ang uban nga nagkatibuwaag sa dinaganay.

Si Camero diha sa sulod sa roydahan apan daling nakasibat sa pag-abot sa kapulisan.

“Wala na ni siya makit-i ang pulis. Dunay usa ka nga bata nisumbong sa atong tropa nga nahadlok siya kay dunay wala mailhing tawo nga nitago sa ilang panimalay. Mao to giadto nila ug gisampit, nakugang ang tropa mipaila nga siya si Police Staff Sgt. Camero ug gipusasan nila kini,” dugang ni Morpos.

Sumala ni Morpos, pipila lang ka metros gikan sa tigbakayan ang panimalay nga gitagoan sa pulis.

Gawas niini positibo sab siya nga gitudlo sa ubang dinakpan nga kauban sila sa pulis sulod sa tigbakayan.

Nasakmit ang usa ka manok igtatari, duha ka bihag nga manok, duha ka buwang, P1,500 nga pusta.