USA ka drug pusher nagsul-ob og uniporme sa pulis dihang nadakpan sa buy-bust uban sa iyang uyab nga kakunsabo niadtong Biyernes, Enero 8, sa alas 7:15 sa gabii sa Sitio Talisay, Barangay Bato, dakbayan sa Toledo.

Si Sergio Manguray, 37, dunay kapuyo ug taga Barangay DAS, Toledo, nadakpan uban sa uyab nga si Jimpie Rose Alfanta, 26, taga DAS, Toledo.

Si Police Lt. Col. Junnel Caadlawon, hepe sa Toledo Police Station nga nahinabi sa Superbalita Cebu, nagkanayon nga taudtaod na nilang gi-monitor si Manguray.

Apan kalit nga nawala sa ilang lugar sa DAS dihang nangadakpan iyang kaubanan.

Nakadawat silag report nga si Manguray, nag-abang og apartment sa Brgy. Bato, ang impormasyon sa mga tawo sa dapit matingala sila kay dunay mga bisita panahon sa kagabhion.

Ang ilang tropa mipalit og usa ka putos nga shabu balor sa P500.

Atol sa transaksiyon, nakuhaan pa kini og daghang bulto sa drugas nga motimbang sa 17 gramos ug mobalor sa P115, 600, armas nga .357 revolver nga dunay unom ka mga bala, ug P1,300 nga halin sa drugas.

Sumala pa niini nga ang plantalya ni Manguray, nagtrabaho siya isip usa ka collector sa lending.

Matag gawas niini, magsul-ob kinig camouflage pants ug jacket nga itom. Kini aron magtuo ang mga makakita niya nga usa kini ka pulis.