MACROHON, Southern Leyte -Patay sa anti-illegal drugs operation ning lungsod ang usa ka suspetsadong drug pusher.

Giila ang suspek nga si Glen Gildo, taga Padre Burgos ning lalawigan ug nalista nga high value target (HVT) sa kapulisan.

Si Gildo gituohan nga sakop sa Acasio Drug Group.

Ang joint drug buy-bust operation sa Philippine Drug Enforcement Agency (PDEA), kapulisan sa Macrohon ug Provincial Drug Enforcement Unit pinangulohan ni Police Major Ariel Nuñez gipahigayon sa Barangay Flordeliz ning lungsod.

Matod sa kapulisan, napalitan sa usa ka poseur buyer si Gildo og walo ka pakete sa gituhoang shabu sa kantidad nga P5,000.

Nakabantay si Gildo nga pulis ang iyang katransaksyon, busa nibunot kini sa iyang armas ug mipabuto sa mga operatiba.

Dugang sa kapilisan, agi og pagdepensa, nibawos sila sa pagpusil ug naigo ang suspek.

Gidala pa sa tambalanan si Gildo, apan gideklarar nga dead-on-arrival sa doktor. (JKDP)