MODAWAT na og balik og mga pasyente sa coronavirus disease (Covid-19) ang Cebu City Quarantine Center (CCQC).

Gibuksan sa Biyernes, Enero 22, ang pasilidad nga wa na magamit human pagminos og maayo sa mga kaso sa Covid-19 sa Dakbayan sa Sugbo sud sa pipila ka mga buwan.

Kini ang gipahibawo ni Cebu City Medical Center (CCMC) administrator Yvonne Cania, kinsa mao sab ang nagdumala sa CCQC nga nahimutang sa North Reclamation Area.

Si Mayor Edgardo Labella nimando sa pagbukas og balik sa pasilidad nga gigastohan og dul-an P60 milyones sa Siyudad sanglit nisaka og balik ang mga kaso sa Covid-19 sa dakbayan.

Ang CCQC nga adunay kapasidad nga 160 ka mga pasyente maoy dako og natabang uban sa New Oasis for Adaptation and a Home (Noah) complex sa South Road Properties sa pagpaalim sa liboan ka mga pasyente sa Covid-19 sukad sa Hunyo sa miaging tuig.

Ang CCQC wa na gipasudlan og pasyente sa Covid-19 sa last quarter sa 2020 sanglit giplanohan kining i-upgrade ug himuon na nga permanenting tambalanan isip extension sa CCMC.

Matod ni Cania nga andam na ang mga medical staff sa mga pasyante nga ma-admit.

Sa Enero 21, 2021, ang Siyudad sa Sugbo duna nay 702 ka aktibong mga kaso sa Covid-19. (PAC)