PELIGRO nga di maaprobahan ang appointment ni manlalaban Danilo Almendras isip city administrator sa dakbayan sa Lapu-Lapu.

Kini human gipadaplin sa konseho ang iyang appointment atol sa regular session niadtong Huwebes, Hulyo 18, samtang susihon pa nila ang tiunay nga residency status ni Almendras.

Si Almendras gitudlong city administrator ni Lapu-Lapu City Mayor Junard “Ahong” Chan.

Matod ni Konsehal Rico Amores nga nadesisyonan lang nila nga i-defer lang nila sa sunod session sa konseho ang pagtuki sa appointment ni Almendras kay ilang gikwestyon sa residency sa Dakbayan sa Lapu-Lapu.

Ubos sa sa Section 480 sa Local Government Code, usa sa requirements isip city administrator mao nga kinahanglan lumolupyo sa dakbayan diin siya mangalagad og labing minos unom ka buwan.

Pasabot ni Amores nga ang naasoy nga rekisitos gisunod ni Almendras dihang nialagad siya isip city administrator sa dakbayan sa Mandaue hangtod niadtong Hunyo 30, 2019.

Buot pasabot niini, wa pa makapuyo si Almendras sa dakbayan og labing minos unom ka buwan.

Adunay gipakita nga certificiation si Almendras sa konseho nga residente siya sa usa ka subdivision sa Brgy. Basak. (GCM)