SAFETY officer namatay human nakuryentihan samtang nanghayhay sa miaging buntag sa Barangay Cantumog, lungsod sa Carmen, amihanang Sugbo.

Si John Ryan Mag-aso, 28, ulitawo, taga Brgy. Azusina, lungsod sa Barili, patay na nga naabtan sa mga pulis. Si Mag-aso giingong safety officer sa Philkonstract Corporation.

Si Major Roger Quijano, hepe sa Carmen Police Station nga nahinabi sa Superbalita Cebu, nagkanayon nga alas 4:30 sa kaadlawon sa Sabado sayo nga naligo si Mag-aso subay sa gisulti sa kauban niini nga si Engr. Eugenio Nagawang Jr.

Matod ni Quijano nga si Mag-aso naligo sa likod sa bunkhouse. Human niini, niadto sa pikas bunkhouse kay nanghayhay sa iyang t-shirt nga gilabhan human sa pagkaligo.

Apan sa iyang paghayhay, iyang gikuptan ang galvanized nga wire nga hayhayan, apan nakuryentihan kay dunay napanit sa wire nga nakakutay ngadto sa pipeline nga konektado sa pikas bunkhouse nga poste sa kuryente.

Si Mag-aso wa dayon makit-i sa iyang mga kauban ug nakugang na lang sila dihang napalgan nga nag-ubo nga wa nay kinabuhi. (GPL)