DUNAY mga tigpayuhot og shabu nga yano ra nga i-deliver pinaagi sa pagsakay sa mga pampasaheruan nga bus.

Kini ang nasuta sa kapulisan sa dakbayan sa Mandaue human masikop atol sa buy-bust ang 62-anyos nga molupyo sa Barangay Tutay, lungsod sa Pinamungajan ang giingon nga yano ra nga magdala og shabu sakay sa usa mga bus gikan sa ilang lungsod padung sa South Bus Terminal.

Nikabat tanan og dul-an P700 mil ang shabu nga nasakmit sa mga pulis.

Gitug-an ni P/Colonel Julian Entoma, direktor sa Mandaue City Police Office (MCPO), nga nasikop si Juan Lausa, 62, human gitudlo nga gigikanan sa drugas sa mamaligyaay sa Mandaue.

Samtang, ang Drug Enforcement Unit sa MCPO ang nihimo og buy bust batok sa usa ka Aldrick Baynas, 37, taga Barangay Apas sa dakbayan sa Sugbo, kinsa giingong maoy bag-ong mamaligyaay og drugas sa Ibabao Estancia sa Mandaue.

Uban sa nasikop kaniya mao si Richard Murillo, 36, silingan ni Baynas.

Giingon nga gikan ni Murillo ang mga ipangbaligya ni Baynas sa Mandaue.

Nahitabo ang buy-bust, diin nasikop ang duha sa Zuelig street, barangay Centro, Mamdaue, alas 8, Martes sa buntag, Marso 12.

Sa gihimo nga dugang’ interogasyon sa kapulisan giingon nga niangkon si Murillo nga gikan kang Lausa ang iyang suplay sa shabu.

Hinungdan diha dayon gisugo sa pulis nga ipakontak aron sa pag-deliver og 100 grams.

Dihang hapit na ang udto, niabot si Lausa, diin ang shabu naa lang sa iyang bulsa.

Matud ni Entoma nga ilang nasuta nga anak niini dunay kaso nga murder ug nasentensyaan na og reclusion perpetua ug anaa sa New Bilibid Prison ang kontak niini kon dunay shabu nga ipahatud.

Matud ni Entoma, posibleng mao kini nga kauban ni Rustico Ygot nga piniriso usab sa NBP, ang kanhi kapuyo sa drug queen nga si Jocelyn Encila, ug konektado sa Kuratong Baleleng.

“Ato ni gitan-aw nga mao ra ni sila nga grupoha. Mao ni ang mga shabu nga gi-apud-apud from Mindanao, then ang kontal naa sulod sa Bilibid..” gitug-an ni Entoma sa Superbalita Cebu.

Apan gihimakak ni Lausa nga gikan pa sa ilaha sa Pinamungajan ang shabu.

Giangkon nga siya nag-deliver shabu, apan wala siyay kasayuran kon shabu ba kini.

Matod niya nga tawagan siya sa iyang anak nga naa sa NBP nga naay ipakuha sa dakbayan sa Sugbo, hinungdan nga iyang largahan, ug itunol sa laing tawo sa siyudad.

Naengganyo usab siya human nga suholan.

Matud ni Entoma nga sa ilang nakuha nga dugang kasayuran gikan sa maong mga dinakpan nga aduna pay gipangtahod nga kinilo nga shabu sa Sugbo. Ang uban mismo sa bus terminal o gawas niini magtagbo ug itunol ang druga.

Ang tulo giilang newly udentified drug player. Wala sa drug watchlist.