PADAYON nga nagpaalim sa iyang panimalay sa Dakbayan sa Mandaue si Daanbantayan Mayor Sun Shimura human nga nakagawas na kini sa hospital.

Kini maoy gipahibaw sa lungsod Lunes, Hunyo 29, 2020, pinaagi sa official facebook page niini.

Human nga gipaubos usab sa swab test ang pamilya niini, migawas nga negatibo sa coronavirus ang tulo ka mga anak niini.

Hinuon ang iyang kapikas nga si bokal Kerrie Keane Shimura nagpabiling assymptomatic.

Matod sa mensahe sa lungsod nga anaa na sa 70 porsyento nga recovery stage si Shimura ug wala na usab kini mopakita ug simtomas sa Covid.

Gilaraw nga makabalik na usab sa trabaho ang pipila ka empleyado sa opisina sa Mayor tungod stable na ang kondisyon niini.

Kahinumdoman nga mipahibaw si Shimura nga nag positibo kini sa Covid niadtong Hunyo 21.

Siya ang ikaduhang mayor nga nataptan sa Covid sa isla sa Sugbo.

Sa kinatibuk-an may unom ka mga positibong kaso ang lungsod.

Padayon nga panawagan sa mayor sa mga konstituente niini nga mosubay sa health protocols sa Department of Health aron wala nay ma risgo sa pagkatakod sa covid sa lugar. (ANV)