GITINGUHA sa Cebu City Government nga mahatag ang tag P10,000 nga financial assistance sa dul-an 2,000 ka mga medical health frontliner sa pribadong tambalanan alang sa buwan sa Agusto, sa dili pa matapos ang buwan sa Setyembre, 2020.

“Tungod man gud kay first time ni nato nga manghatag, dunay mga documentary requirements para dili ta mosango sa Commission on Audit kay una ning nahitabo nga ang city government mohatag og ayuda sa mga private medical frontliners, apan nindot na karon kay gi-prepare na ang payroll,” pasabot ni Cebu City Mayor Edgardo Labella.

Ang mayor naluoy sa mga private medical health frontliner gumikan sa ilang pag-atiman sa mga Covid-19 positive nga pasyente, apan gamay ra ang ilang sweldo nga nadawat og dili paigo sa risgo nga ilang gi-atubang.

Si Labella gusto nga matabangan ang maong sektor sanglit dako sila og natampo pagkontrolar ug pag-ayo sa mga nataptan sa maong balatian. (PAC)