DILI menos 25 ka kabalayan ang naugdaw samtang upat ang partially burned sa dakong sunog nga niigo sa Sitio Ipil, Barangay Mambaling, dakbayan sa Sugbo Huwebes sa kadlawn, Oktubre 31, 2019.

Gibana-bana nga 30 ka pamilya ang apektado sa maong sunog.

Sigon ni Cebu City Fire Marshal Asraf Grar nga nagsugod ang sunog sa balay ni Junmark Gonzaga. Nagsugod ang sunog pasado ala 1:45 sa kadlawn.

Tungod kay dali kaayong nakakatag sa ubang balay ang maong sunog, daling gisaka sa third alarm ang maong sunog.

Gibana-bana nga muabot og P139,000 ang danyos sa maong sunog.

Dugang ni Grar nga ila pang gipalawman ang ilang imbestigasyon kung unsay hinungdan sa maong sunog.

Usa sa mga fire volunteer nga mitabang sa pagpatay sa sunog ang dali nga gidagan ang ilang panimalay human siya gipahibalo nga gilamoy na sa kalayo ang ilang panimalay.

Si Dave Villamor sa iyang pakighinabi sa Superbalita Cebu niingon kaniadto daw malooy siya nga mag lantaw sa mga pamilya nga sa usa ka pamilok lang nawad-an ug panimalay human masunogan.

Apan karon mas lahi ra jud diay nga siya na ug iyang pamilya ang apektado sa maong sunog.

Una nang gipaabot sa Bureau of Fire Protection (BFP) sa paghandom sa Kalag-kalag nga sutaon kanunay ang ilang mga balay sa dili pa mobiya samtang moduaw sa ilang minahal sa kinabuhi nga nangamatay na.

Niadtong Miyerkules, Oktobre 30, naka heightened alert na ang BFP hangtud matapos ang tinuig nga paghandom sa Kalag-Kalag. (Superbalita Cebu)