NING kanunay na nga pag-uwan, ang Metropolitan Cebu Water District (MCWD) nagpaabot nga ang supply sa tubig sa ilang duha ka dagkong mga tinubdan mahibalik sa normal sa umaabot nga duha ka mga semana.

Si MCWD information officer Edna Inocando niingon nga ang produksyon sa Buhisan ug Jaclupan dam, dagkong mga tinubdan sa supply sa tubig, nagkadaghan na.

Ang Buhisan dam niumento sa iyang water production ngadto sa 4,000 cubic meters per day samtang ang Jaclupan dam duna na karoy 28,000 cubic meter per day.

Sa wa pa ang ting-uwan sa Hunyo, ang Buhisan dam nag-produce lang og 3,800 cubic meter kada adlaw samtang ang Jaclupan naa lang sa 17,000 matag adlaw.

Ang naandang ma-supply nga tubig sa Buhisan naa sa 6,000 cubic meter matag adlaw samtang ang Jaclupan naa sa 33,000 cubic meter matag adlaw.

“If magsige sige na ni ang ulan, hopefully makabalik ta sa ilang normal productions in two weeks time,” matod ni Inocando sa interview tali sa SunStar Cebu sa Agusto 15, 2020.

Bisan kon nagsaka na ang supply sa tubig sa duha ka dams, matod ni Inocando nga di kini kaseguraduhan nga wa nay dapit nga mag-antos sa kakuwang sa tubig.

“Mao ra gyud gihapon considering nga kuwang gyud ang atong supply,” nagkanayon si Inocando.

Iyang giawhag ang mga tawo nga magdaginot sa tubig kay bisan unsa nga higayon mabalda ang supply sa tubig.

“Magpundo sad kanunay og tubig kay dili man pod nato masiguro nga dunay mga emergency interruptions due to main line leak repairs, power interruption diin ma-affected ang wells or electro mechanical problem sa pump,” siya niingon.

Samtang mas daghan ang uwan nga mibundak ning tuiga itandi sa 2019 sa samang mga buwan, matod sa Philippine Atmospheric Geophysical Astronomical Services Administration (PAGASA). (JJL, dugang taho ni WBS)