KARON nga hingpit nang giimplementar ang bag-ong wage compensation scheme alang sa mga drivers, niawhag ang Regional Tripartite Wages and Productivity Board (RTWPB) 7, ahensiya ubos sa Department of Labor and Employment (DOLE) 7 nga tumanon kini sa mga operators ug tag-iya sa mga bus.

Marso 9 dihang ni epekto ang DOLE Order No. 118-12 kabahin sa part-fix/part-performance compensation scheme sa mga bus driver ug konduktor.

Matod ni Grace Carreon sa RTWPB 7 nga kinahanglan nga mosumiter ang matag operator sa bus/mini bus sa maong bag-ong wage compensation scheme nila ug kinahanglan kini nga maaprobahan sa board.

Kini nagpasabot nga ang matag driver ug konduktor magdawat na usab og minimum wage nga P386 ang adlaw kon nagbase kini sa Metro Cebu.

Dugang ni Carreon nga ang aprobado nga wage compensation scheme alang sa mga driver ug konduktor usa kini sa rekisito aron maka-renew ang usa ka operator sa iyahang prangkisa sa Land Transportation Franchise and Regulatory Board (LTFRB) 7.

Sa pagkakaron, wala pa’y nadawat ang maong ahensiya nga aplikasyon sa bag-ong wage compensation scheme.

Uwahing aplikasyon kabahin sa maong compensation scheme niadto pang 2012, diin 20 ka operators ang nisumiter sa ilang wage compensation scheme.

Apan walay labot ang draber sa school ug tourist buses sa maong revised department order, dugang sa direktor sa LTFRB. (HBL)