ORMOC City, Leyte - Liboan ka panimalay sa dakbayan sa Ormoc ang gihatagan og tagsa ka sakong bugas sa lokal nga kagamhanan sa dakbayan.

Base sa inisyal nga sabot sa Ormoc City Covid-19 Task Force, tag napulo ka kilo lang unta ang ihatag kaduha matag semana.

Apan si City Mayor Richard Gomez midesisyon nga tagsa ka sako nalang ang ihatag aron maibanan usab ang kahago sa paghatag hatag kon tag 10 ka kilo kada duha ka semana.

Base sa datos, naa sa kapin 60,000 ka balay ang dakbayan.

Giklaro sa Siyudad nga dili hinuon mahatdan ang 110 ka barangay sa usa lang ka adlaw kay magdepende lang ang Siyudad sa mga local rice traders.

Sa miaging Sabado, una nga nahatdan ang Barangay Tambulilid, Linao, Lao, Catmon, District 29, Batuan, Alegria ug Ipil.

Dugang sa mayor nga i-schedule ra nila ang sunod nga mga barangay nga hatdan na usab sa mga sinakong bugas.

“Mas easier for us nga tagsa ka sako nalang kada balay. At least ma-manage nila kining ilang bugas. Sila na ang bahala instead of mag repacking nga maghatag nasab og 10 kilos,” matod sa Mayor

Gusto usab sa mayor nga ihatud sa mga barangay officials ang bugas kada balay kay aron dili na maglinya linya ug mapabilin usab ang social distancing.

Ang tagsa ka sakong bugas lahi sa kinilo nga gihatag sa barangay. Ang kinilo nga gihatag nga dunay apil delata ug noodles, ang barangay ang nagpalit pero ang tagsa ka sako, pinalit sa LGU.

Gihangyo sa kagamhanan ang mga pamilya nga nagpuyo lang sa usa ka balay nga magbahin bahin lang sa usa ka sakong bugas ning panahon sa krisis. (JKDP)