USA ka pabrika sa semento sa Sugbo nidonar og usa ka libo nga mga inempakeng hinabang alang sa mga apektado kaayo sa enhanced community quarantine nga gipahamtang sa kagamhanan aron mabuntog ang gikahintapang coronavirus disease 2019 (Covid-19) nga mikatap sa tibuok kalibotan.

Gidala sa Taiheiyo Cement Philippines, Inc. (TCPI) ang mga pinutos sa Kapitolyo pagka-Huwebes (Abril 2) sa hapon uban sa laing usab ka libo ka face masks gikan sa Taiheiyo Cement Corporation (TCC) sa Japan alang sa healthcare frontliners.

Unang midonar ang maong kompanya og 10 ka sako sa 50-kilos nga bugas sa lungsod sa San Fernando niadtong Marso 19 human misugod ang quarantine ug midugang pa’g 50 ka sako ngadto kang Mayor Lakambini Reluya sa dihang gihingpitan pa kini dayong Marso 31.

Gidawat ni Gob. Gwendolyn F. Garcia ang mga donasyon gikan kang Kazuhiko Ichizawa, chief executive officer ug pangulo sa TCPI, ug ni Vanessa N. Bongcawil, tagduma sa general community affairs.

“Paagi kini namo nga motubag gilayon sa panawagan ni Gob. Garcia sa pribadong sektor nga moabag sa probinsya nga makubsan ang epekto pakigkumbati sa mga Sugbuanon sa Covid-19,” mipahayag si Ichizawa.

Matag putos adunay lima ka kilo nga bugas, nagkalainlaing mga delata ug pipila ka mga noodles, matod ni Bongcawil.