SA ikaduhang higayon, ang Talisay City Police Station (TCPS), ubos sa pagpangulo ni PMaj. Gerard Ace Pelare, nakadawat og pasidungog isip Best Component City Police Station for Police Community Relation sa tibuok Central Visayas (CV).

Ang kapulisan sa nasod nagsaulog karon sa 25th Public Community Relations (PCR) Month sa pakiglambigit sa mga pulis ngadto na sa komunidad.

Si Pelare nagkanayon nga ang ilang pasidungog nagagumikan sa iyang mga sakop nga nihatag sa ilang serbisyo.

Sa miaging buwan, ang TCPS nakadawat usab og pasidungog isip Best Investigation Team sa tibuok probinsya sa Sugbo.

Matod ni Pelare, lain nasab kini nga hagit alang kanila nga mas palambuon pa ang ilang serbisyo alang sa katagbawan sa katawhan.

Samtang, si Mayor Gerald Anthony ‘Samsam’ Gullas, Jr. mapasigarbuhon sa grupo ni Pelare sa ilang nahimo sa siyudad.

Gisaad sa mayor nga padayon ang iyang suporta sa kapulisan sa tanang programa niini tungod sa ilang maayong binuhatan. (BBT)