NIDANGOP si Lapu-Lapu City incoming City Mayor Junard Chan ngadto sa Department of Interior and Local Government (DILG) pinaagi sa pagduso og suwat nga nagmando sa tanang regular nga mga kawani sa city hall nga motunga sa Hulyo 1.

Matod ni Chan nga adunay giingong personalidad nga nimando sa maong mga kawani sa di pagtunga sa maong petsa nga adlaw sa paglingkod niya isip bag-ong mayor sa dakbayan.

“Naa tay nadunggan o nahibaw-an nga there’s somebody nga nimando nila (regular employees) nga dili sila pa-reporton on the first day of July,” matod ni Chan.

MAGPABILIN

Sa kadtong mosupak sa kamanduan, iyang gitahasan ang DILG ingon man ang Civil Service Commission sa pagpahamtanng unya og silot niadtong absent sa maong adlaw.

Apan nipasalig ang bag-ong mayor nga ang tanang Persons With Disabilities (PWDs) magpabilin sa ilang trabaho, hayan dugang PWDs pa ang dawaton alang niadtong interesado nga manarbaho sa city hall.

“Ang tanang PWDs atong i-retain bahalag wa to sila mosuporta (kandidatura) nako,” dason ni Chan.

Ang Lapu-Lapu City Hall adunay 655 ka mga regular nga kawani ug 58 ka PWDs.

Samtang ang kapin sa 1,900 ka mga job order makapadayon sab sa ilang trabaho bisan kon mapupos na ang ilang kontrata pinaagi unya sa iyang luwatan nga executive order.

“Kini without political color. Ato silang gihatagan og kahigayonan to continue their service,” dasyon sa opisyal.

Giklaro ni Chan nga iyang ipa-ubos sa evaluation ang mga JO aron hashasan kadtong mga badlungon o ligoy sa trabaho.

Ang 1900 kapin ka mga JO nangalagad ni Radaza, kinsa naa sa iyang katapusang termino.

Ang mayor nangalagad sa Dakbayan sulod sa siyam ka mga tuig nga way pilde sa piniliay.

Nabalaka siya nga sa iyang pagbiya, mawagtangan og trabaho ang mao nga mga JO.

Atol unya sa Hulyo 1 human sa flag raising ceremony sa tanang mga kawani, ipatawag ni Chan ang tanang department heads alang sa usa ka meeting. (FVQ)