USA ka 90 anyos nga babaye ang napaig human naapil sa pagkasunog sa iyang payag sa Barangay Libjo, lungsod sa Tabogon, alas 8:30 sa gabii niadtong Sabado, Hunyo 19.

Ang dalagang guwang nga si Ardenia Veraque, bedridden na, napaig na sa pag-abot sa mga bombero sa dakbayan sa Bogo ug kapulisan.

Si Police Staff Sgt. John Paul Almero sa Tabogon Police Station nga nahinabi sa Superbalita Cebu, nagkanayon nga sa ilang pasiunang pakisusi, usa ka lampara nga natumba maoy sinugdanan sa pag-ulbo sa kayo.

Dugang ni Almero, gipahibalo sila sa mga opisyal sa barangay bahin sa sunog apan gumikan sa kalayo sa bukirang dapit, naugdaw na sa hingpit ang gamayng balay sa biktima.

Sa pagsusi, ilang nakit-an ang lawas sa biktima nga napaig na.

Sumala sa kabanay nga naglubog na ang biktima ug nag-inusara sa payag nga pinuy-anan layo og silingan.

Ang biktima duawon lang sa iyang kabanay sa adlawan aron pakan-on apan inig kagabii, biyaan lang kini nga mag-inusara.

“Lampara raman iyang suga, anha daw ibutang sa ulohan, tan-aw namo aksidenting natagak, o kaha posibling nasaghiran sa mananap,” dugang ni Almero.

Unya dunay daghang panapton ug mga habol sa ubos hinungdan nga paspas kaayo ang kayo, wala na matabang sa mga silingan ang biktima.

Ang sunog giisa sa 1st alarm nga midanyos og P22 mil.