Usa ka trak nahaybol mga alas 9 sa buntag sa Sabado, Abril 9, 2022 sa Brgy. Polog, Consolacion, amihanang Sugbo taliwa sa way hapit undang nga pag-uwan.

Ang dapit bukiran nga bahin sa lungsod ug dunay dulhugon ug tangason nga mga karsada.

Ang taho sa aksidente nadawat sa Consolacion Municipal Disaster Risk Reduction and Management Office sa mga alas 9:22 sa buntag.

Ningresponde usab sa hitabo ang Bureau of Fire Protection (BFP), Emergency Rescue Unit Foundation (Eruf), kapulisan ug Cubacub Rescue Team sa Mandaue City.

Matod sa MDRRMO nga wa nila matino kon pila ang mga sakay kay ang driver na lang sa trak ang ilang naabtan kay napiit sulod sa sakyanan.

Ila pa kining gigamitan og tools aron makuha ang driver, kinsa gihatod sa North General Hospital sa Cebu City.

Mga alas 2:15 na nahulbot ang driver gikan sa trak, apan wa na mohatag sa ngan ang buhatan.