SA PAGSULOD sa panahon sa Kuwaresma, ang Catholic Bishop’s Conference of the Philippines (CBCP) mianunsyo sa bag-ong sumbanan karong Miyerkules sa Badlis ug Biyernes Santo aron sa paglikay sa pagpasa sa COVID-19.

Nigawas ang sumbanan nga gisuwat ni CBCP President Romulo Valles, Huwebes, Pebrero 20, 2020.

Gipadala ang sumbanan ngadto sa mga bishop ug diocesan administrator isip pagsunod sa precaution sa World Health Organization (WHO) inubanan konsultasyon ni CBCP Episcopal Commission on Liturgy Executive Secretary Rev. Fr. Genaro Diwa.

Naandan na sa mga Katoliko nga kada Miyerkules sa badlis, ang mga pari mobadlis sa agtang gamit ang abo, apan karon sa bag-ong sumbanan, ang abo ibubo na lang sa ulo.

Giklaro sa sumbanan nga di kini kabag-ohan kay nagsubay gihapon kini sa karaang pamaagi sa simbahang Katoliko. Gani ang pagbobo og abo sa ulo usa ka pamaagi sa paghinulsol.

Sa Biyernes Santo, naandan sa mga Katoliko ang paghawok ug paghikap sa Veneration of the Cross. Karon, ginadili na kini ug gihangyo ang katawhan sa pagluhod o pagduko.

Kining dugang sumbanan aron sa paglikay sa risgo nga mahatag niini sa pagpasa sa COVID-19.

Sumpay lang ang maong sumbanan sa mga milabayng mga sumbanan sama sa pagdili sa pagkinuptanay og kamot matag “Amahan Namo” ug paggamit sa kamot aron pagdawat sa kalawat.

Pahimangno sab niini nga ang pagsulod sa panahon sa Kuwaresma mao sab ang panahon sa pagba-o sa kinabuhi isip Kristiyano pinaagi sa self-conttrol sama sa pagpuasa, pagkamanggihatagon, pagkamangiluluy-on ug pag-ampo.

“”Our charity is also expressed in our concern for the well-being of our brothers and sisters, thus our utmost care and efforts towards the prevention of the spread of COVID-19,” sigon sa sumbanan.