Gitunol na sa Land Bank of the Philippines (LBP) ang inisyal nga 15,000 ka mga cash card para sudlan sa financial assistance gikan sa Cebu City Government.

Si Mayor Edgardo Labella maoy nidawat sa cash cards nga gitunol ni Vivian Bisnar, manager sa LBP nga sanga sa M.J. Cuenco Aenue duol sa Plaza Sugbo, kagahapon, Disyembre 3.

Sugod Enero 2021, ang maong cash card sudlan og tag P1,000 matag buwan sanglit ang mga senior citizen kauban ang mga PWD makadawat og tag P12,000 nga financial assistance gikan sa City Hall.

Kini ang gipahibawo ni Bisnar sanglit inig kadawat sa mga lolo ug lola sa ilang cash cards, mahimo na kining ma-activate.

Mapasalamaton si Labella sa LBP sa pagtabang niini sa City Government nga mahatag na pinaagi sa cashcard ang financial assistance sa senior citizens ug paglibre niini sa bayranan sa cash card nga tag P150 kada usa.

Ang maong programa gibuhat ni Mayor Labella alang sa kaluwasan sa senior citizens ug persons with disability (PWDs) ug sa tunhay nga pagpanghatag sa financial assistance. / PAC