WA NAY himuon nga ceremonial inauguration ang Department of Public Works and Highways (DPWH) sa pagbukas sa Mambaling Underpass karong Hunyo 15, Sabado.

Matod ni Engr. Boy Sayson, Construction Division Chief sa DPWH 7, nga tungod kay adunay prior commitment ang mga opisyal sa DWPH 7 hinungdan nga diretso na lang kini nilang ablihan sa Sabado, sa alas 10 sa buntag.

Ang underpass nga gisugdan pagtukod niadtong tuig 2017 nagkantidad og P700 milyones. Tumong niini nga masulbad ang trapiko sa N. Bacalso corner F.Llamas, Dakbayan sa Sugbo.

Atubangan sa mga dagkong kan-anan ug supermarket ang maong dapit.

Dugang ni Sayson nga human gihimo ang inspeksyon sa Quality Assurance Unit, gipahigayon dayon nila ang inspeksyon sa Regional Inspectorate Team.

Gilangkuban kini sa nagkadaiyang representante, kansang mga miyembro naglakip sa assistant regional director ug division chiefs.

Sa pagkakaron, gihuman nalang pagbutang ang traffic light sa underpass diin gitabangan na kini karon sa sakip sa Cebu City Transportation Office (CCTO) ug mga sakop sa DPWH 7 aron pwede na sa pagbukas sa underpass sa Sabado.

Niadtong Hunyo 11, Martes dihang gipahigayon ang uwahing coordination meeting tali sa contractor nga WT Construction, DPWH 7 ug Cebu City Transportation Office (CCTO) aron mahisgutan ang preparasyon sa hingpit nang pag-abli sa tunnel.

Matod ni CCTO head Francisco Ouano nga bisan unsa nga sakyanan ang makaagi sa tunnel, apan di pwede paagian sa bus ug mini bus.

Pabilin sa South Road Properties nga paagion ang mao nga mga sakyanan.

“Yes kay total bus and mini bus 600, so maka add up sila sa trapik diri sa N. Bacalso. But as of the moment lang na, its up to Mayor Labella if iya ba i-consider puhon,” si Ouano sa iyang text message sa Superbalita Cebu.

Niadtong Mayo atol sa piniliay, temporaryo nga giablihan ang maong tunnel sa motorista aron magamit sa pag-uli alang sa eleksyon.