Ang Kepco Cebu Employees Association-Workers Solidarity Network (KCEA-WSN) gustong ilhon og balik nga opisyal nga unyon sa tagdumala sa Korean Electric Power Corporation (Kepco) plant sa lungsod sa Naga, habagatan sa lalawigan sa Sugbo.

Ang unyon nihulga nga mopahigayon og welga kon dili ilhon sa kompaniya.

Sa interbyu sa WSN federation officer nga si Dennis Derige sa SunStar Cebu sa Huwebes, Marso 2, 2023 kini nibutyag nga ang unyon dili gusto nga mahimong hinungdan sa dakong pagkabalda sa enerhiya ug halapad nga kasamok sa publiko.

Dako ang paglaom ni Derige nga ang Korean management sa Kepco moila sa KCEA-WSN nga unyon sa collective bargaining agent ug mo-renegotiate sa collective bargaining agreement(CBA) sulod sa lima ka tuig.

Sa pagkakaron, ang mga detalye bahin sa labor strike gipugngan ni Derige alang sa elemento sa surprisa.

Si Derige nitug-an sa SunStar Cebu nga human sa pito ka cooling off period, kon ang duha ka mga partido wala pa magkasinabot, ang welga iduso sa unyon.

Gipasabot niya nga posibleng mahitabo kini sa umaabot nga mga semana.

Ubos sa cooling off period, ang Department of Labor and Employment (DOLE 7) kinahanglang motigom sa duha ka mga partido aron makighusay sa tensiyon.

Sukad kagahapon, nagkanayon si Derige nga nakigtagbo ang Dole 7 sa mga representante sa KCEA-WSN aron ipasaka ang ilang mga hangyo ngadto sa management sa Kepco. (EHP)