USA kapamilyahan ang giharos og dakop sa kapulisan sa Police Station 2 Byernes sayo sa buntag sa dihang gipasanginlang nagpadagan og negosyo sa illegal drugs sa Soong 1, Barangay Mactan, Lapu-Lapu City.

Lakip sa nangadakpan mao ang 54 anyos nga biyuda nga si Lydia Pinote-Aying; Fernando Pinote-Aying, 40; Vicente Pinote-Aying, 22; Michelle Tampus-Aying, 30; Marianito Gonzaga-Intong, 45, nga pulos nagpuyo sa Aying Compound sa Sityo Soong 1, Barangay Mactan.

Samtang si Dave Melicor, 21, nga taga-Sityo Buyong, Barangay Maribago, ang gidemalas og gilakip sa pagsikop sa dihang naatlan nga misuyop diha sa maong area.

Ang mga dinakpan pulos mga newly identified nga nalambigit sa illegal drugs sanglit wa kini malakip sa drugs watchlist sa kapulisan.

Ang Police Station 2 Drug Enforcement Unit nga gipangulohan ni Police Chief Inspector Wayne Magbanua nihimo og buy-bust operation sa Aying compound inabagan sa PDEA-Central Visayas ganihang kadlawon, Agosto 17.

Sa dihang poseur buyer nipalit og droga diin nipositibo ang transaction, dali nga mihimo og pagsiksik sa area ang mga operatiba.

Ubang mga dinakpan gisikop kay nakuhaan og droga gikan sa ilang posisyon nga gibana-bana nga mo kantidad ang tanan dul-an sa P65,000.

Ang mga nahisgutang dinakpan gilumpong og pusas ug gidala sa Regional Crime Laboratory office alangsa ultra-violet (fluorescence powder) test ug drug test sa wa pa ibalhug sa Lapu-Lapu City holding cell samtang giandam ang tukmang kaso batok kanila. (Superbalita Cebu)