USA ang patay samtang upat ang nasikop sa pagserve og search warrant sa mga sakop sa kapulisan batok sa usa ka "high value drug target" sa Barangay Cahayag, lungsod sa Tubigon, lalawigan sa Bohol, ganinang alas 11 sa buntag, Hulyo 11, 2019.

Mga sakop sa Regional Special Operation Group-Central Visayas (RSOG 7) Bohol Island team armado og search warrant nga giluwatan ni Executive Judge Leo Moises Lison sa Regional Trial Court (RTC) Bohol batok kang Ritchie Banquil, 30-anyos, nga nag puyo ra usab sa maong dapit.

Atol sa pagpresentar sa kapulisan sa search warrant sa maong suspetsado, kalit lang namusil si Banquil.

Niresulta kini sa pinusilay tali sa mga sakop sa RSOG 7 ug ni Banquil.

Naka angkon ug samad pinusilan sa lawas si Banquil nga maoy hinungdan nga ila kining gidali pagdala sa tambalanan sa lungsod sa Tubigon apan gi deklara kini sa mga doctor nga dead on arrival.

Nasikop sad sa kapulisan ang mga kauban ni Banquil nga giila nga silang Junrey Taghap, Jayson Asuela, Kristina Banquil ug Romel Ullamot nga pulos nakuhaan og pinakete sa gidudahang shabu.

Sa gihimong pag siksik sa panimay ni Banquil nakakuha silag mga binulto nga gituohang shabu nga moabot ngadto sa usa ka kilo nga mobalor ang tanan sa P6.8 Million.

Matod ni Police Major Ricardo Tero, ang hepe sa RSOG-7, nga ang kapulisan mi target kang Banquil nga usa sa notadong drug pusher sa maong lungsod. (AYB)