ORMOC City - Duha ka pulis, usa niini giingong nalambigit kang self-confessed drug lord Kerwin, nasikop sa anti illegal drugs operation sa Barangay Macabug, Ormoc City, alas 11:50 sa buntag, Biyernes, Pebrero 15, 2019.

Lakip sa nasikop ang sibilyan nga si Ricsan Salle, 29, nagpuyo sa maong barangay.

Ang duha ka mga pulis giilang mao sila si Police Officer 1 Ronilo Felizarta ug Police Officer 1 Pelboy Lopez.

Si Felizarta nadestino sa San Vicente Police Station sa Northern Samar samtang si Lopez nadestino sa Northern Samar Provincial Mobile Force Company.

Si Felizarta gitumbok ni kanhi Albuera police station chief Jovie Espinido nga nalambigit kang Kerwin.

Matod ni Espinido nga si Felizarta protektor ni Kerwin kaniadto.

Si Espinido mao ang hepe sa Abuera police dihang nabutyag ang kalambigitan sa mga Espinosa sa illegal drugs.

Ang iyang amahan nga si Mayor Rolando Espinosa napatay niadtong Nobiyembre 5, 2016 sud sa bilanggoan.

Ang operasyon gipangulohan sa Ormoc City Drug Enforcement Unit pinangulohan ni Police Senior Inspector Franklin Romeo Parangan Jr ug Police Chief Inspector Demosthenes Magnaan sa Mobile Force Company.

Nagsilbi usab nga perimeter security ang Philippine Army uban ni Captain Khevin Jay Latoza. Kahuman sa transaksyon, nisenyas na ang poseur buyer nga positibo ang resulta.

Wa na makapalag ang duha ka mga pulis sa dihang gipalibutan sa mga operatiba.

Nasakmit ang pito ka pakete nga may gituhoang shabu, mga paraphernalia, cellphones ug 9mm pistol nga service firearm.

Ang reklamo batok kang Felizarta nabasura ra hinuon gumikan sa ka kuwang og ebedinsya.

Kasong kalapasan sa Republic Act 9165 o Comprehensive Dangerous Drugs Act ang giatubang sa mga suspek. (JKDP)