ANG Department of Interior and Local Government (DILG) nipahinumdum labot sa di paghimo og midnight appointment ug midnight deal, ilabi na diha sa mga local government unit.

Una nang nipasidaan si Governor-elect Gwendolyn Garcia kang outgoing Governor Hilario Davide III nga di mohimo niini diha sa Kapitolyo, ilabi na sa kwestiyonableng mga transaksiyon sa nahibiling mga adlaw sa iyang termino.

Si Davide niingon nga nakahibawo siya sa balaud busa di na kinahanglan pang pahinumdoman siya niini.

Matod ni DILG Cebu Provincial Director Jerome Gonzales, angay hinumduman sa mga opisyal nga padayon pang gipatuman ang election ban alang sa mga appointment ug pagsud og kontrata alang sa bisan unsang proyekto sa LGU ug uban pang mga ahensiya sa gobiyerno.

Gawas niini, gipadayag ni Gonzales nga duna sa’y lagda ang Civil Service Commission (CSC) labot niini.

Busa angay motamod ang mga LGU officials ug head of office.

Si Davide nakahukom nga di na lang idayon ang upat ka andana nga parking building.

Iya na lang kining itugyan ngadto sa administrasyon ni Garcia tungod kay naa na man sa transition period.

Naa ra sa sunod nga administrasyon kon ipadayon pa ba ang proyekto o di.

Ubos sa election ban, gidili ang pagbalhin sa mga empleyado ubos sa civil service gikan Enero 13 ngadto sa Hunyo 12.

Gidili sab ang appointment o pag-hire sa bag-ong mga empleyado, pag-establisar og bag-ong mga posisyon, pag-promote ug pagsaka sa sweldo sa mga empleyado gikan Marso 29 hangtod Mayo 12.

Ang Omnibus Rules on Appointment and Other Human Resource Actions sa CSC nidili usab sa appointments human ang eleksiyon hangtud sa Hunyo 30. (AZLG)