UYOAN sa pag-agawan nabilanggo human siya pasanginli nga ni-rape sa 9 anyos nga batang babaye nga anak sa iyang ig-agaw sa alas 12 pasado sa Biyernes sa kaadlawon, Pebrero 12, 2021 sa usa sa mga barangay sa Dakbayan sa Carcar.

Mga ngan sa suspek ug biktima gipugngan ning mantalaan subay sa nalatid sa balaud.

Ang 40 anyos nga Bakliad (di tinuod niyang ngan) ulitawo, mangubkubay og bas gidakop sa kapulisan sa Carcar alas 9 sa buntag sa Biyernes human moreklamo ang pamilya ni Ding (di tinuod niyang ngan).

Si Police Staff Sergeant Leny Padin sa Women and Children’s Protection Desk (WCPD) sa Carcar Police Station nga nahinabi sa Superbalita Cebu nagkanayon nga si Ding niana nang buntag nitug-an sa iyang mga ginikanan sa gibuhat ni Bakliad kaniya.

Si Ding nagmulo sa kasakit sa iyang kinatawo ug gipahiling dayon sa Pink Room sa Vicente Sotto Memorial Medical (VSMMC).

Atol sa insedente, si Bakliad diha natulog sa balay sa bata kay makadaghan na kini buhata kay mag-agaw sila samahan.

GISUGO SA YAWA?

Matod ni Padin nga dihang ilang gisikop si Bakliad, nihimakak una kini, apan pag didto na sa police station, iyang giangkon ang pagmolestya niya kang Ding.

Si Bakliad nga nahinabi sa Superbalita Cebu nagkanayon nga hubog siya niadtong higayuna.

Nag-inom silang upat ka mga mag-agaw, lakip ang amahan sa bata.

Nakahurot silag upat ka mga botelya sa brandy ug dihang nahubog, didto na siya nakatulog sa balay sa bata samtang ang iyang duha ka mga ig-agaw nanguli.

Siya nialegar nga iyang nabantayan si Satanas nga diha sa atop sa balay.

“Nakahibalo ko nga ang yawa nasab ni. Kana bang taas og sungay. Gihunghungan ko niya, Sir, sa yawa ba. Ang uban nilatin, wala ko kasabot. Usa ra ako nahinumduman. Niingon siya nga buhata na ang gusto nimong buhaton. Ako dayong gi-___ sa wala na tudlo,” asoy ni Bakliad.

Matod niya nga wala siyay nahimo kon dili pagtuman sa gusto sa yawa kay hubog usab siya.

Nagtuo siya nga ang yawa kontra sa iyang ig-agaw nga amahan ni Ding kay usa ka albularyo.

“Mi-take advantage ang yawa kay hubog man ko ato higayuna. Unya wala koy panagang, sama sa orasyon. Wala sab ko kapangadye, mao sa sige niyag hunghong, ako nahilabtan ang bata,” dugang niya.

Ang iyang nahinumduman nga pagmata pagkabuntag ni Ding, nisulti kini nga “langasa ni Tiyo matulog, magbalhinbalhin,” matod ni Bakliad.

Nakugang siya dihang nangabot ang mga pulis samtang siya nanguha og kahoy ug gidakop.

Si Bakliad nag-inusara sa pagpuyo sa iyang balay.