GIBANABANANG moabot sa 18,000 ka runners ang maghatag og kolor nga green sa nanag-unang kadalanan sa dakbayan sa Sugbo sa pagpahigayon sa 2019 Milo Marathon Cebu Regional Qualifiers nga gikatakda karong Septiyembre 29.

Mao kini ang gibutyag ni head organizer Ricky Ballesteros sa interbyu sa Sun.Star Cebu kagahapon.

Gilaumang magpalig-unay og tuhod ang labing maayong runners sa Sugbo ug kasikbitang mga dapit sa 21-kilometer race nga usa sa 10 ka regional qualifying legs alang sa national finals.

Ang ubang mga mahiligon sa pagdagan alang sa kahimsog sa kalawasan ang magkombati sa 10K ug 5K categories.

Ang runners nga makasulod sa qualifying time mao ang mahatagan og kahigayunan nga makadagan sa national finals nga gikatakda karong Enero sa sunod tuig.

Sa naandan, ang national finals ipahigayon unta sa premirong semana sa Disyembre apan giuswag kini ning higayuna gumikan sa pag-host sa nasod sa Southeast Asian (Sea) Games nga sugdan karong Nobiyembre 30.

Ang nahabiling qualifying legs gikatakda karong Oktubre 6 sa Iloilo City, Oktubre 13 sa General Santos City, Oktubre 20 sa Davao City ug Nobiyembre 17 sa Cagayan de Oro City.

Ang katapusang adlaw sa pagparehistro alang sa Cebu leg gikatakda karong Septiyembre 25 sa opisina sa Philippine Sports Commission sulod sa Cebu City Sports Center.

Ang rehistrasyon nagkantidad og P1,000 alang sa 21, P900 sa 10K samtang P110 sa mga estudyante ug P160 sa adults alang sa 5K ug 3K.

Ang mga mosalmot sa 21K nagkinahanglan og fit-to-run medical certificate atol sa rehistrasyon. (RSC, ESL)