MATAMBALAN na ang kahidlaw sa mga mahiligon og motocross sa pagpahigayon sa 22nd Lou Ornopia Motocross Cup karong adlawa, Abril 9, 2022 sa MS Motosuit Motorsports Park sa Barangay Calambua, lungsod sa San Remigio, Cebu.

Kapin sa 200 ka riders gikan sa Visayas ug Mindanao ang maglumba sa kompetisyon nga gipasiugdahan ni Lou Ornopia, kanhi Sportsman of the Year awardee sa Sportswriters Association of Cebu (SAC).

“I’m super excited because this is our first race in over two years. Taud-taud gyud ta nga wala nakapalumba tungod sa pandemiya ug karon nabalik na gyud ang atong aksiyon,” matod ni Ornopia nga gipadangat sa local sports media.

“Miabot na gyud ang panahon nga gikahinaman sa tanan.”

Matod ni Ornopia, kinsa maoy gikonsiderar nga “amahan sa motocross” sa Sugbo, mahinungdanon kini alang kaniya gumikan kay mao kini ang labing unang lumba nga ipahigayon sa Motorsports Park nga bag-uhay lang niyang gipatukod.

“It’s the first of its kind in Cebu, butang nga ato gyud ikapasigarbo,” dugang ni Ornopia.

Mapasigargbuon si Ornopia nga gawas sa pagpalambo sa motocross sa Sugbo, ang pagtukod niya sa Motorsports Park nakahatag og panginabuhian sa ilang mga residente hilabi na ning panahon sa pandemya.

Ang Motorsports Park adunay gidak-on nga 10 ka mga hektarya nga magamit sab sa rally driving ug mountain biking events.

Tinguha ni Ornopia nga mahimong motocross capital sa Sugbo ang Calambua.

Ang ika-22 nga edisyon sa labing karaan nga motocross event sa gawas sa Manila giayudahan nila ni kongresista Janice Z. Salimbangon, Provincial Board Member Kerrie Shimura, Vice Mayor Al Pestolante, Team Rojo-Pestolante, mayor Erwin Agustino, Hon. Annalyn Flores Toling, Engr. Susan Ornopia, Mike Stoddart, Siegfred Ornopia, ug mga opisyal sa barangay Calambua.

Ningsuporta sab niini ang NF Motor Parts ni Noli Ornopia, Rowena Jubay, N-Style ni Nico Ornopia, Kapenarra ni Zenaida Cataquez, JCO Motor Parts, Olilab Oil, PLTCOL Joceric De la Pena, PMAJ JR De la pena, JSUPT Felipe Montejo, JINSP John Pajantoy hasta ang Bantay Construction, SNR MBJ Motomaze Shop, Dinah RBS Construction and Supply, LMO Motor Parts and General Merchandise, RMO Motor Parts ni Boy Ornopia, F&FO Motor Parts, ug Andy Uy.