TAODAOD na man tuod siyang wala nakaaway apan sa iyang pagbalik, nagpakita dayon og saktong abilidad si ALA fighter KJ Cataraja.

Gipagawas ni Cataraja ang iyang kaabtik ug kusog aron paundangon si indonesian Frengky Rohi sa 3rd round sa main event sa Idol 3 boxing promotion sa Tabuelan Astrodome sa lungsod sa Tabuelan, Cebu.

Mao kini ang labing unang away ni Cataraja sulod sa dul-an sa usa ka tuig.

Nagkanayon si Cataraja nga karon nga nahuman na niya ang iyang pagtungha sa kolehiyo, makatutok na siya sa iyang pagpamoksing ug kining gipakita pinaagi sa pagmakmak ni Rohi.

“Ready nako para sa regional title fight,” matod ni Cataraja sa interbyu sa Sun.Star Cebu.

Si Catajara, 23, migraduwar sa kursong BS Criminology sa University of the Visayas (UV) sa miaging tuig.

Nagkanayon si ALA Promotions president Michael Aldeguer nga nagplano siyang ilakip si Cataraja sa undercard sa all-Filipino world title fight tali nila ni Donnie Nietes ug Aston Palicte.

Aduna pa man tuod 8-0, 7KOs nga rekord si Cataraja apan malaumon si ALA Promotions presidente Michael Aldeguer nga mahatagan dayon kini nila og regional title fight.

“Because of his record as an amateur we’re hoping for the WBO World Youth title for him,” matod ni Aldeguer. “We’re not sure yet (what type of opponent we’ll give him). We’re going to take it slow with KJ, he only has eight fights. He had a long layoff because he went to school. So now he has to go back to the boxing mode. We’ll see what’s out there.”

Sa laing mga away, ningdaog sila si Virgel Vitor batok Gerpaul Valero (UD), Christian Bacolod batok Mervin Lulu (TKO 20, Jhun Ryan Quimbo batok Jimmy Paypa (SD), Esneth Domingo batok Ryan Makaputin (KO 1), Justin Darap batok Elmer Liboon (UD), JR Villafuerte batok Tomas Rebusit (TKO 3). (EKA, ESL)