HUMAN sa 36 ka mga tuig, nakadesisyon ang Alaska franchise nga mobiya na sa Philippine Basketball Association (PBA).

Kagahapon, Pebrero 16, 2022, gibuhian ni team governor Dicky Bachmann ang makapakurat nga anunsyo nga tiwason na lang sa Alaska Aces ang nagpadayon nga season-ending Governor’s Cup conference ug hingpit na silang manamilit sa labing unang professional nga liga sa Asya.

“We thought long and hard before making this final decision. However, we believe that this will allow us to refocus our resources on providing affordable nutrition for Filipino families,” opisyal nga pamahayag ni AMC chairman Fred Uytengsu nga napatik sa Spin.ph.

“The Aces franchise will always be very special to me. I had the good fortune of starting this franchise at the age of 24 and learn so much about the team dynamics and building championship teams from players and coaching staff.”

Ang Alaska usa sa labing malampusong mga prankisa sa liga diin nakaangkon kini og 14 ka mga kampyunato lakip na niini ang talagsaong grand slam title niadtong 1996 ubos sa paggiya ni coach Tim Cone.

Ubay-ubay nga basketball superstars ang gikan sa Alaska sama nila ni Johnny Abarrientos, Jojo Lastimosa, Jeff Cariaso, ug Sonny Thoss.