Gikatakdang moaway si IBF super flywright world champion Jerwin Ancajas batok ni WBO champion Kazuto Ioka sa Japan para sa ilang unification bout nga gitrabaho na para mapahigayon ang binukbokay karong Disyembre 2021.

Kini ang gipadayag ni MP Promotions president Sean Gibbons human sa ilang gipahigayon nga sabotsabot uban sa kampo sa Japanese boxer.

Matod pa ni Gibbons nga kon ang away ipahigayon didto sa Japan, wala silay angay problemahon ug ila nalang sundon ang mga health protocol nga gipatuman.

"We are working with a unification fight with Ioka,” matod ni Gibbons nga unang nigawas sa Business Mirror.

Gipadayag sa presidente sa MP Promotions nga makasugat sila og kalisdanan kon ang away adto ipahigayon sa United States gumikan sa pundo nga kinahanglanon.

“Nobody in the US will pay for the fight. We have to follow the money,” paghulagway ni Gibbons kinsa niingon nga kon mapakyas ang ilang sabotsabot, mapugos sila pagbalhin sa away didto sa America.

Si Ancajas (33-1-2, 22 KOs) nagtinguha sa maong unification bout human sa iyang kadaugan niadtong Abril pinaagi sa unanimous decision batok sa Mexican nga si Jonathan Javier Rodriguez sa Mohegan Sun Arena, Montville, Connecticut.

Si Ancajas, 29, nga lumad sa Panabo City, Davao del Norte naglungotlungot human siya gihagit ni Ioka niadtong Septiyembre 1 para sa super flyweight unification. (PAC)