MANAGLAHI ang nasinati sa duha ka Pinoyng mga boksidor nga ningsagubang og dagkong away kagahapon sa buntag (RP time) sa managlahing mga nasod.

Si Jerwin Ancajas (32-1-2, 22KOs) mirehistro og 6th round TKO nga kadaugan batok kang Mexican Miguel Gonzalez (31-3, 8KOs) aron depensaan ang iyang International Boxing Federation (IBF) super flyweight title sa Puebla, Mexico.

Kini maoy ikawalong higayon nga nadepensaan sa lumad nga taga Panabo, Davao Del Norte, ang iyang titulo.

Samtang sa Brooklyn, New York, ang laing Pinoy nga si Marlon Tapales (33-2, 17KOs) nasugamak sa 11th round TKO nga kapildihan batok kang Japanese Ryosuke Iwasa (27-3, 17 Kos) sa inilugay sa interim IBF super bantamweight belt. (ESL)