DUHA ka championship fights sa World Boxing Federation (WBF) ang i-abli sa Big Yellow Promotions sa tuig 2020 sa dihang mopahigayon kini og boxing promotions karong Marso 9, 2020.

Si Seth Oliver Tio, ang chief executive officer (CEO) sa Big Yellow Promotions, uban sa iyang head trainer Christopher “Pingping” Tepora, mihan-ay nila ni Clyde Azarcon ug Rey Caitom nga moaway alang sa WBF title nga ipahigayon diha sa Robinson’s Galleria sa dakbayan sa Sugbo.

Si Azarcon, lumad nga taga Davao del Sur apan ania na magbasehan sa dakbayan sa Sugbo, naghupot og 16-3-1, 6KOs nga baraha, makigsangka sa beteranong si Mike Kinaadman alang sa bakanting WBF International minimumweight title.

Sa iyang uwahing away niadtong Oktubre 19, 2019, iyang gi-knockout si Garry Rojo sa ikatulo ka round sa Sabang Covered Court sa Danao City.

Si Kinaadman, sa iyang bahin, aduna nay 22 ka away. Dili man tuod impresibo ang iyang 7-13 nga baraha ug duha ka tabla, apan sa niagi niyang away niadtong Disyembre 21, 2019 sa Enan Chiong Activity Center sa Naga City, iyang natumba ang kanhi world champion nga si Vic Saludar sa second round.

Hinuon nakabangon si Saludar ug mi-knockout kaniya sa ikaunom nga round.

Magsilbing kabahin sa Fight Nigh 4 boxing series, laing gikahinaman nga panagsangka sa maong promotions, mao ang away sa kanhi Ala Boy nga si Rey Caitom alang sa bakanting korona sa WBF minimum weight division diin iyang ikasangka si ArAr Andales sa Bacoor, Cavite.

Si Caitom, lumad taga Mandaue City kinsa wala pay pildi sa iyang siyam ka professional fight, atoa karon magbasehan sa Singapore. Siya ang kasamtangang naghupot sa WBC Asian Boxing Council Continental minimum title.

Ang 20-anyos nga Andales naghupot usab og 10-2 nga baraha.

Gawas sa duha ka championship fights, matod ni Tepora, nga ila na usab karon nga gihan-ay ang mga away alang sa mga supporting bouts. (JBM)