USA ka video nga gi-post sa social media networks niadtong Biyernes, Marso 12, 2021 ang nagpakita nga gidakop sa kapulisan ug barangay officials si billiards Hall of Famer Efren ‘Bata’ Reyes sa usa ka raid diin nagduwa ang gitawag og The Magician og billiard taliwala sa padayong hulga sa Covid-19.

Sa taho sa Spin.ph, usa ka Romel Robes ang inisyal nga nag-post sa iyang Facebook account og video diin nakita giimbargo sab sa kapulisan ug barangay officials ang mga ekipo sa billiards sa usa ka billiards pool sa Barangay San Vicente sa San Pedro, Laguna.

Gipasabot sa kapulisan nga ang duwa diin giimbitar si Reyes wala’y permit.

Gitangtang na man tuod ang video sa Facebook apan na-post na sab kini sa YouTube diin nakita si Reyes nga nakigduwa nga wala’y mask batok sa wala mailhi nga kontra.

Ang maong kalihukan nakasupak sa estriktong quarantine protocols nga gipatuman ning panahon sa pandemic.

Ang billiards usa sa mga natad sa paugnat sa kusog nga wala pa tugti nga makabalik.

Si Reyes nag-edad na og 66 hinungdan nga sama sa ubang senior citizens, gidid-an kining makagawas sulod sa panimalay gawas lang kon mahinungdanon ang tuyo. (ESL)