MIPIRMA og bag-ong duha ka mga tuig nga contract extension si Beau Belga sa Rain or Shine Elasto Painters, Nobiyembre 26, 2021.

Ang pinirmahay pormal nga gianunsyo sa Elasto Painters sa ilang social media page.

Si Belga, 34, maoy labing ulahi sa mga magduduwa nga sunodsunod nga gipapirma og bag-ong kontrata sa Elasto Painters.

Sa sayo pa, si guard Rey Nambatac mipirma og bag-ong tulo ka mga tuig nga kontrata samtang sila si Norbert Torres ug Anton Assistio parehong mipirma og duha ka mga tuig nga kontrata.

Ang 6’5” nga si Belga manugduwa sa iyang ika-11 nga season sa Philippine Basketball Association (PBA) ubos sa kampo sa Elasto Painters, nga ningkuha kaniya pinaagi sa three-team trade nga naglambigit sab sa Meralco Bolts ug sa nabungkag nga Air21 Express.

Ang produkto sa Philippine Christian University nahimong usa sa labing mahinungdanong instrumento sa pagdaog sa Elasto Painters og kampyunato sa 2012 Governors Cup ug 2016 Commissioner’s Cup ubos sa paggiya sa kanhi coach sa team nga si Yeng Guiao.

Si Belga gikonsiderar nga usa sa beteranong mga lider sa Elasto Painters kauban si Gabe Norwood.