Nakugang ang boxing world sa dihang gilupig ni Dmitry Bivol ang grabe ka inilog nga si Saul “Canelo” Alvarez pinaagi sa unanimous decision didto sa Las Vegas, Nevada kagahapon.

Sa pagsulod pa lang sa ring, tataw na nga mas gidapigan sa mga tawo si Alvarez kay miyanog man ang “boos” sa pag-abot ni Bivol sa ring.

Samtang si Alvarez, adunay grand entrance kuyog ang Mariachi band, adunay fireworks ug ang boxing’s pound-for-pound treat nga anaa sa raised platform.

Bisan paman niini, wa makurat si Bivol (20-0, 11 KOs), mipakita og saktong labok batok kang Alvarez (57-2-2, 39 KOs) aron madepensahan ang World Boxing Association (WBA) light heavyweight belt.

Ang tulo ka judges nga si Tim Cheatham, Dave Moretti ug Steve Weisfeld pulos mipabor kang Bivol sa iskor nga 115-113.

Bisan tuod defending WBA light heavyweight champion si Bivol, mas grabe ang impact nga dala ni Alvarez kay siya man ang unang boksidor nga naka-unify sa upat ka world title belts sa super middleweight division.

Ang upat ka middleweight nga titulo mao ang WBA, World Boxing Council, International Boxing Federation ug World Boxing Organization. Nakompleto kini ni Alvarez human gilupig si Caleb Plant niadtong Nobiyembre sa miaging tuig.

Apan sa light heavyweight match, gipakita ni Bivol nga lahi na kini sa gigikanan ni Alvarez nga division. Gigamit ni Bivol ang iyang height ug reach advantage aron makabentaha sa kontra.

Gidominar ni Bivol ang 12-round bout diin nakaigo kini’g 36 percent sa power punches, basis a CompuBox. Na-outpunched ni Bivol si Canelo, 152-84.

“I knew that he has hard punches and he will beat on my body or my arm,” batbat ni Bivol “I think from the (start) of the fight, I see him; I see what he wants to do.”

Wa makauyon si Alvarez sa desisyon sa tulo ka judges.

“I definitely didn’t lose the fight,” sigon ni Alvarez pinaagi sa translator. “I think I got a little bit tired toward the final rounds, but I felt good.”

Ang kontrata adunay rematch clause diin uyon ang duha ka boksidor nga mag-atbang pagbalik sa ring.