MOSUWAY pagposte og 2-0 nga bintaha ang Meralco Bolts sa ilang pagpakigbatok og balik sa defending champions Brgy. Ginebra Gin Kings sa Game 2 sa Philippine Basketball Association (PBA) Governor’s Cup karong alas 6:00 sa gabii sa Smart Araneta Coliseum.

Ang Bolts, nga wala sukad nakadaog batok sa Gin Kings sa miaging tulo ka mga higayon nga nag-abot sila sa finals ning maong komperensiya, ningdominar sa Game 1, 104-91, sa best-of-seven championship series niadtong Miyerkules, Marso 6, 2022.

“It’s very important to get that first win,” matod ni Meralco coach Norman Black nga napatik sa www.pba.ph.

Alang ni Black, kinahanglan nilang pahimuslan ang tanang kahigayunan nga ningpabor kanila aron makabawos sa crowd-favorite nilang kontra.

Adunay dakong haw-ang sa puwersa sa Gin Kings gumikan kay wala si Japeth Aguilar, kinsa adunay angol.

Wala pa’y kaseguroan kon makabalik na ba’g duwa si Aguilar ning higayuna.

Hinuon, dili angay molugak bisan gamay ang Bolts gumikan kay aduna pa’y igong ikabuga ang puwersa sa Gin Kings pinangulohan sa ilang dugay nang import nga si Justine Brownlee.

Ang ubang mga pambato sa Gin King mao sila si Scottie Thompson, LA Tenorio, Christian Standhardinger ug Arvin Tolentino.

Ang Bolts mosalig og maayo nila ni import Tony Bishop, Allein Maliksi, Cliff Hodge ug Chris Newsome.