Sa ikaduhang higayon, sagubangon sa Boston Celtics ang malisod nilang misyon sa 2022-23 National Basketball Asssociation (NBA) --- paglikay sa kuhit sa panamilit.

Himuon kini sa Celtics sa ilang pag-host sa Miami Heat sa Game 5 sa Eastern Conference finals series ning Huwebes, Mayo 26, 2023, alas 8:30 sa buntag (PH time), sa TD Garden.

Sa Game 4, nagpabiling buhi ang paglaom sa Celtics human sila nakaposte og dakong kadaugan, 116-99, nga maoy nakapahak sa labaw sa Heat sa best-of-seven series, 3-1.

Sa kasaysayan, wala pa’y hingpit nga nakabangon gikan sa 0-3 nga pagkalubong sa series sulod sa 151 ka mga higayon.

Taliwala niini, nagpabiling malaumon ang Celtics sa ilang poruhan. “We’ve just got to go win another one. That’s all that matters,” matod ni Celtics guard Marcus Smart.

“We take it one game at a time. We understand the odds are stacked against us, but we’re a team that believes in us no matter what, and we’ve just got to keep going, and all that matters is the next game.”

Ang Celtics usa sa mga nag-una sa opensa ug hasta sa depensa atol sa regular season nga maoy nagpahimo kanilang No. 2 team sa Eastern Conference.

Apan wala kini napagawas sa Celtics sa nag-unang tulo ka mga duwa ning maong series.

Hinuon, ang ilang dakong kadaugan sa Game 4 gituohang nakapabalik sa ilang morale ug nakahatag kanila og dugang kadasig aron mahimong labing unang team nga makabangon gikan sa 0-3 nga biya sa series.

“We’ve still got a long uphill battle to go,” batbat sa labing sinaligan sa Celtics nga si All-Star forward Jayson Tatum.

Alang sa Heat, kinahanglan nilang tupngan ang determinasyon ug kadasig sa Celtics aron hingpit na nilang matiklop ang series.

Nagkanayon ang lider sa Heat nga si Jimmy Butler, wala ra siya nabalaka nga nakatilaw sila og kastigo sa Game 4.

“No. If anything, it will build momentum for us knowing that we have to play with a lot more energy,” asoy ni Butler.

“We’ve got to play like our backs are against the wall. But I think all year long, we’ve been better when we’ve had to do things the hard way.”