GIPALAGPOT sa ARQ Builders/KSB Glass ang Fighter 50, 85-77, samtang gihagsa usab sa Kiboy's Computer Solution (KCS) ang Aspa Formworks, 75-68, sa semifinals round sa Cebu City Mayor Edgar Labella Charter Cup nga gipahigayon Lunes sa gabii, Pebrero 24, 2020, sa Sports Institute Gym sa Sawang Calero, Dakbayan as Sugbo.

Sa ilang tagsa-tagsa ka kadaugan, ang ARQ ug KCS maoy mag-abot sa finals Martes sa gabii, Pebrero 25, 2020, samtang ilogan usab ang third place honor sa Fighter 50 ug Aspa Formworks.

Human makaposte og 20-13 nga labaw sa pagkapupos sa first quarter, ang ARQ Builders ni coach Marvin Caro wa gyud mopakita og paglurang sa ilang opensa ug yanong miinat sa bintaha, 41-26, sa halftime.

"Actually, ang zone defense namo maoy epektibo kaayo. Pitik-pitik na lang tong among matchup. Na-scout na man daan namo ilang mga plays," matod ni Caro sa interview sa Superbalita.

Nangulo sa Builders si Shaquille Imperial, ang 2019 Cesafi most valuable player, nga may 18 puntos, upat niini gikan sa three-point area, samtang midugang og 15 ang beteranong si Ferdinand Lusdoc.

Mitali usab ang kanhi PBA player nga si Jerrick Canada og 12 puntos nga gibuwakan usab og tulo ka tres, ug 11 puntos usab ang natampo ni Reed Juntilla.

Dili maayo ang kagabhion alang sa Fighter 50 sanglit sila lang si Jaybee Mantilla (17 puntos) ug Kevin Villafranca (16 puntos) ang naka-double fight.

Batok sa CKS, gibutyag ni Caro nga mohimo sila og dakong adjustment sa ilang depensa.

"Advantage sila sa speed pero lamang sab mi sa experience. Mao nga kinahanglan nga dili mi mosabay sa ilang duwa," matod ni Caro.

Samtang sa laing duwa, niagi una og hugot nga kombati ang Kiboy's Computer Solution una pa nila mabuntog ang Aspa Formworks.

Nakalabaw ang Aspa, 37-36, human sa first half ug pabilin kining naghupot sa manubela 36-39, 9:34 segundos ang nahabilin sa third quarter, kortesiya sa jumpshot ni Frangile Omolon.

Apan nagsugod pagsakmit sa labaw ang KCS human kini mipahagsa og 11-2 nga rally nga giduslitan sa tres ni Harold Cincoflores. Miabag kang Cincoflores sila si Vincent Minguito ug Froilan Maglasang aron lugiton ang 49-41 nga labaw.

Gikan niini, taliwala sa mga pagsuway sa Aspa, maigmaton nga naprotehian ang labaw sa CKS, ang bugtong team nga wa makaangkon og kapildihang ning usa ka semanang torneyo.